(ఆన్‌లైన్‌, నంగునూరు) పాత చీరలతో బొంతలు కుడుతూ బతుకు వెళ్లదీస్తున్న ఆ బాలిక ఉన్నత చదువులకు పేదరికం శాపంగా మారింది. ఇన్నాళ్లూ కష్టాలను, కన్నీళ్లను దిగమింగుతు పేదరికంతొ పోరాటం చేస్తూ చదువును వదలకుండా కృషి చేసింది. ఓ వైపు బొంతలు కుడుతేనే పూట గడిచే కుటుంబం వారిది. దర్జీ పను ద్వారా వచ్చిన డబ్బులతోనే ఆ కుటుంబాన్ని సాకుతోంది. వృద్ధ్యాప్యంలో ఉన్న తల్లిదండ్రులను ఆ బాలికే పోషిస్తుండగా, ఆమె అన్న కుటుంబ పోషణ కోసం వలసవెళ్లాడు. సమస్యలతో సహజీవనం చేస్తూ కవిత చదువునూ వ దలలేదు. ఎన్ని అడ్డంకులు ఎదురైనా వాటిని అధిగమిస్తూ పదవ తరగతిలో ఉత్తమ మార్కులు సంపాదించింది. నంగునూరు మండలం బద్దిపడగ గ్రామానికి చెందిన నిరుపేదఅయిన కవిత ట్రిపుల్‌ ఐటీకి ఎంపికైంది.

ఇపుడు ఆ చదువులు చదవాలంటే ఆ కోర్సు పూర్తయేసరికి రూ.50 వేల పై చిలుకు కావాల్సి ఉంది. ఇటు కుటుంబ భారం మోయలేక, అటు ఉన్నత చదువులకు డబ్బులు లేక ఆ చదువుల తల్లి కన్నీళ్లు కారుస్తోంది. మానవతా వాదులు, దాతలు ముందుకువస్తే వారి అండతో ఉన్నత చదువులు చదువుతానంటోంది. వివరాల్లోకి వెళ్తే… బద్దిపడగకు చెందిన గూడూరు నర్సవ్వ రాంచెంద్రంల మూడవ కూతురు కవిత. తల్లిదండ్రులు వృద్ధులు కావడం, ఉన్న సోదరుడు పనికోసం వలస వెళ్లడం, ఇద్దరక్కల వివాహాలు కావడంతో కుటుంబ పోషణ ఆమె మీదే పడింది. తల్లి నర్సవ్వ గ్రామాలు తిరుగుతూ పాతచీరెలు తీసుకువస్తే వాటిని బొంతలుగా కుడుతూ వాటితో వచ్చే చాలి చాలని డబ్బుతో కుటుంబాన్ని సాకుతోంది. కొన్నాళ్లు కుటుంబ భారంతో మ««ధ్యలో బడి మానేసింది.

దీంతో కవిత చదువులో ముందుండటంవల్ల ఆమె పరిస్థితిని తెలుసుకొని పాఠశాల ప్రధానోపాధ్యాయుడు వల్లపురెడ్డి గురువారెడ్డి విద్యార్థి కవితకు చదువులో ప్రోత్సాహం అందించాడు. దీంతో ఉపాధ్యాయుల ప్రోత్సాహంతో సమస్యలు ఎదురైనా చదువును కొనసాగించి ఇటీవల జరిగిన పదవ తరగతి పరీక్షలో 494 మార్కులు సాధించి ట్రిపుల్‌ ఐటీకి ఎంపికైంది. ఈ కోర్సు పూర్తి కావాలంటే రెండు సంవత్సరాలకు రూ.6 వేల చొప్పున 12 వేల రూపాయలు, నాలుగు సంవత్సరాలకు రూ.40 వేలు చెల్లిస్తేనే ట్రిపుల్‌ ఐటీ పూర్తవుతుంది. కాగా పనిచేయనిదే పూట గడవని కవిత పరిస్థితి దయనీయంగా మారింది. ఉన్నత చదువులు చదువాలంటే సరస్వతీ కటాక్షంతో పాటు ముఖ్యంగా లక్ష్మి కటాక్షం ఉండాలి. కానీ కడు నిరుపేదఅయిన కవిత ఉన్నత చదువులకు దయనీయులు, మానవతా వాదులు స్పందిస్తే ఉన్నత చదువులను పూర్తి చేసే పరిస్థితి నెలకొంది.

source : aandhrajyothy, medak edition 2 july 2008

బడిగంట గణగణ
 
(ఆన్‌లైన్‌ ప్రతినిధి, సంగారెడ్డి) ఎప్పటిలాగే.. ఎన్నో సమస్యలతో..విద్యాసంవత్సరం గురువారం నుంచి మొదలవుతున్నది. ప్రాథమిక స్థాయి నుంచి విద్యావ్యవస్థను పటిష్ఠపరిచేందుకు ప్రయత్నిస్తున్నామని పాలకులు ప్రకటించడం తప్ప ప్రభుత్వ పాఠశాలలకు ఒనగూరుతున్న ప్రయోజనాలు కనిపించడం లేదు. ఏఏటికాఏడు పెరుగుతున్న విద్యార్థుల సంఖ్యకు అనుగుణంగా కనీస వసతులైన గదులు, ఫర్నిచర్‌, ఉపాధ్యాయుల కొరతతో పాటు తాగునీటికి, టాయ్‌లెట్లకు ఇబ్బందులు తప్పడం లేదు. జిల్లా వ్యాప్తంగా 2182 ప్రాథమిక పాఠశాలల్లో సుమారు మూడు లక్షలపై చిలుకు విద్యార్థులు విద్యాభ్యాసం చేస్తున్నారు.

అదేవిధంగా 570 ప్రాథమికోన్నత పాఠశాలల్లో లక్షపైచిలుకు, 654 ఉన్నత పాఠశాలల్లో మరో లక్షా అయిదు వేల మంది విద్యార్థులు నేటి నుంచి చదువుకోనున్నారు. రాష్ట్ర పాఠశాల విద్యాశాఖ మంత్రి సి.దామోదర్‌ రాజనర్సింహ ప్రాతినిధ్యం వహిస్తున్న ఈ జిల్లాలో వందల సంఖ్యలోని ప్రభుత్వ పాఠశాలల్లో కనీస వసతులు మచ్చుకైనా లేవంటే ఆశ్చర్యం కలగకమానదు. కాకపోతే మంత్రి రాజనర్సింహ కృషితో గత విద్యాసంవత్సరంలో జిల్లాకు పెద్దఎత్తున మంజూరైన ఫర్నిచర్‌ను ప్రథమ ప్రాధాన్యతగా ఆయన తన అందోలు నియోజకవర్గంలోని దాదాపు అన్ని పాఠశాలలకు సమకూర్చారు. జిల్లాలోని మిగతా నియోజకవర్గాలలోని పాఠశాలల్లో ఫర్నిచర్‌ కొరత స్పష్టంగా ఉన్నది. జిల్లాలోని ప్రాథమిక, ప్రాథమికోన్నత, ఉన్నత పాఠశాలల్లో ఉన్న గదులలో 811 గదులకు ఇంకా మరమ్మతులు చేయాల్సి ఉన్నది. రాజీవ్‌ విద్యామిషన్‌ వార్షిక ప్రణాళిక ప్రకారం పాఠశాలల్లో నలబై మంది విద్యార్థులకు ఒక గది చొప్పున ఉండాలి. ఆ మేరకు ప్రస్తుతమున్న పాఠశాలల్లో అదనంగా 1726 గదులు అవసరమున్నాయి. ఇందులో రాజీవ్‌ విద్యామిషన్‌ నుంచి 180 గదుల నిర్మాణం చేపట్టగా, ఇందిరమ్మ పథకం మొదటి ఫేజ్‌ కింద 814 గదులు మంజూరయ్యాయి. ఇందులో ఇప్పటి వరకు నాలుగు వందల గదుల నిర్మాణాలే పూర్తయ్యాయి.

అలాగే ఇందిరమ్మ పథకం రెండో విడతలో 666 గదుల నిర్మాణం మంజూరు చేయాల్సి ఉండగా, 180 గదుల నిర్మాణాలకే మంజూరయ్యాయి. ఇక కనీస వసతుల విషయానికి వస్తే 984 పాఠశాలల్లో మరుగుదొడ్లు, 955 పాఠశాలల్లో మంచినీటి సదుపాయం కల్పించాల్సి ఉన్నది. అలాగే మధ్యాహ్నభోజన పథకం అమలు చేస్తున్న పాఠశాలల్లో 1797 పాఠశాలకు వంటగదులు నిర్మించాల్సి ఉన్నది. పాఠశాలల్లో కనీస సదుపాయాలకల్పనకు అవసరమైన నిధులు రాజీవ్‌ విద్యామిషన్‌లో అందుబాటులో ఉన్న వాటిని ప్రణాళికాబద్ధంగా ఖర్చు చేసేందుకు సరైన యంత్రాంగం లేకపోవడమే సమస్యలను తెచ్చిపెడుతున్నది. అందుకే నారాయణఖేడ్‌, నర్సాపూర్‌, మెదక్‌, జహీరాబాద్‌ తదితర ప్రాంతాలలోని అనేక పాఠశాలలు సమస్యలతో సతమతమవుతున్నాయి.

ఏపాఠశాల చూసినా శిథిలమైన భవనమో.. పూరిగుడిసెనో.. తాగునీరు లేకనో.. టాయ్‌లెట్లు లేకనో.. కనిపిస్తాయి. మచ్చుకు నారాయణఖేడ్‌ ప్రాంతంతో పాటు మెదక్‌ పట్టణం, చేగుంట, నర్సాపూర్‌ మండలం బిక్యాతండా, బాల్యాతండా, వాల్యా తండాలలోని పాఠశాలలను చూస్తే ప్రభుత్వ పాఠశాలలు ఎలా ఉన్నాయో అర్థమవుతుంది. విద్యాబోధన విషయానికి వస్తే జిల్లాలోని తరగతులకు అనుగుణంగా ఉండాల్సిన ఉపాధ్యాయులకన్నా సుమారు నాలుగు వేల ఉపాధ్యాయులు తక్కువగా ఉన్నారు. 2006 డీఎస్సీ ద్వారా నియమితులైన ఉపాధ్యాయులను కలుపుకుని జిల్లా వ్యాప్తంగా పదకొండు వేల మంది ఉపాధ్యాయులున్నారు. అయినా ఉన్నత పాఠశాలల్లో మెరుగైన విద్యాబోధన కావించేందుకు గణితం, ఇంగ్లీషు, సైన్స్‌ సబ్జక్టులలో స్కూల్‌ అసిస్టెంట్ల కొరత చాలా ఉన్నది. ఈ కొరత అధిగమించకుండా విద్యార్థులలో విద్యాప్రమాణాలు పెంపొందింపజేసేందుకు చేస్తున్నామని చెబుతున్న ప్రయత్నం ప్రయత్నంగానే ఉంటుందనడంలో సందేహం లేదు. .

ఇంగ్లీషు బోధనతో ఇబ్బందులే ఇదిలాఉండగా ప్రస్తుత విద్యాసంవత్సరం నుంచి 230 ప్రాథమికోన్నత పాఠశాలల్లో ఆరవ తరగతి నుంచి ఇంగ్లీషు మీడియం ప్రవేశపెడుతున్నారు. ఇందుకోసం ప్రస్తుతమున్న 570 ప్రాథమికోన్నత పాఠశాలల్లో 170 పాఠశాలలను మూసేశారు. వాటి స్థానంలో అయిదో తరగతి వరకు ఉండేలా ప్రాథమిక పాఠశాలలను కనసాగిస్తున్నారు. ఈ పాఠశాలల్లో తీసేసిన ఆరు, ఏడు తరగతులను రెండు కిలోమీటర్ల దూరంలో ఉన్న ప్రాథమికోన్నత పాఠశాలల్లో విలీనం చేశారు. అంటే ఆ ప్రాంతాలకు చెందిన విద్యార్థులు రోజు రెండు కిలోమీటర్ల దూరం నడిచి పాఠశాలకు వెళ్లాల్సి వస్తున్నది. దీనికి తోడు సిీబీఎస్‌ఇ సిలబస్‌తో విద్యాబోధన కావిస్తామంటున్న ప్రభుత్వ వైఖరిని ఉపాధ్యాయ సంఘాలు అభ్యంతరం చెబుతున్నాయి. అసలే ఉపాధ్యాయుల కొరత ఉండగా, వారిలో కొందరికి శిక్షణ ఇచ్చి ఇంగ్లీషు మీడియంలో బోధన కావింపజేయనుండడం ఏ రకమైన ఫలితాలను ఇస్తుందో అధికారులకే తెలియాలి. ఈ పరిస్థితులలో సుమారు నాలుగు వేల మంది విద్యావాలంటీర్లను నియమించాల్సి ఉన్నది. సాధారణంగా విద్యా సంవత్సరంలోనే విద్యావలంటీర్లను నియమిస్తే బోధనకు అంతరాయం ఉండదు. కాని జిల్లాలో విద్యావలంటీర్లను నియమించేందుకు మరో రెండు మూడు నెలలైనా పట్టే అవకాశాలు కనిపిస్తున్నాయి.

.్రపైవేట్‌ జోరు ప్రభుత్వ పాఠశాలల తీరు ఇలాఉంటే ్రపైవేట్‌ పాఠశాలల జోరు ఎప్పటిలాగే ఈ సారి కొనసాగుతున్నది. జిల్లాలోని వివిధ ప్రాంతాలలో ఉన్న 1550 ప్రాథమిక పాఠశాలలు, 175 ప్రాథమికోన్నత పాఠశాలలు, 155 ఉన్నత పాఠశాలల్లో గత నెల రోజుల కిందటే అడ్మిషన్లు మొదలయ్యాయి. ఈ పాఠశాలల యాజమాన్యాలు ఫలితాలతో ప్రకటనలు ఇచ్చి, విద్యార్థుల తల్లిదండ్రులను విశేషంగా ఆకట్టుకున్నాయి. ఆయా స్థాయిలలోని అన్ని ్రపైవేట్‌ పాఠశాలల్లోనూ సీట్ల సంఖ్యకు అనుగుణంగా అడ్మిషన్లు పూర్తయ్యాయి.

తరగతిని బట్టి యాజమాన్యాలు నిర్ణయించిన డొనేషన్‌ డబ్బులను కూడా కట్టేందుకు తల్లిదండ్రులు ఏ మాత్రం వెనుకాడడం లేదు. ఉత్తమ విద్యాబోధనను దృష్టిలో పెట్టుకునే తల్లిదండ్రులు తమ పిల్లలను అందుబాటులో ఉన్న ్రపైవేట్‌ పాఠశాలల్లో చేర్పిస్తున్నారు. ్రపైవేట్‌ పాఠశాలల్లో విద్యార్థులను చేర్పించేందుకు వాహనాలలో ప్రచారం చేయడంతో పాటు పట్టణాలలో టీచర్లను ఇంటింటికి తిప్పుతున్నారు. తమ పాఠశాలలో ఫలితాలు, విద్యాబోధన గురించి వారు చెబుతూ, విద్యార్థులను చేర్పించాలంటూ తల్లిదండ్రులను కోరుతుండడం.. విద్య వ్యాపారంగా ఎలా మారింది తెలుస్తున్నది.

source : aandhrajyothy, medak, 12 june 2008